ASPABER inaugurou a ampliación do seu Centro de Día cun investimento total de máis de 773.000 euros

22 de maio de 2026   -    Do sector

ASPABER celebrou na mañá do venres o acto oficial de inauguración da ampliación do seu Centro de Día, unha actuación que permitirá ampliar a capacidade do servizo ata as 35 persoas usuarias e continuar mellorando a atención ás persoas con diversidade funcional da comarca.

O acto, celebrado na sede da entidade en LGR da Brea, encadrouse dentro da programación especial do 50 aniversario de ASPABER e contou coa presenza da conselleira de Política Social, Fabiola García; do presidente da Deputación da Coruña, Valentín González Formoso; do alcalde de Carballo, Daniel Pérez; do director xeral de Maiores e Atención Sociosanitaria, Antón Acevedo; así como doutras autoridades autonómicas, provinciais e locais.

Durante a xornada realizouse unha visita ás instalacións actuais do Centro de Día e do Centro Ocupacional, así como á nova zona ampliada, onde se presentaron os novos espazos e a ampliación dos servizos da entidade.

O proxecto supuxo un investimento total de 773.883,97 euros, dos cales 637.127,71 euros corresponderon á execución da obra e 136.756,26 euros á adquisición de mobiliario e equipamento.

Para facer posible esta ampliación, ASPABER contou co apoio de diferentes institucións. A Xunta de Galicia concedeu un total de 255.428,38 euros, dos que 150.000 euros foron destinados á financiación da obra e 105.428,38 euros á compra de mobiliario.

Pola súa parte, a Deputación Provincial da Coruña contribuíu con 33.200 euros destinados tamén á adquisición de mobiliario, mentres que Fundación ONCE colaborou cunha achega de 18.588,21 euros para financiar a obra.

ASPABER asumiu directamente unha importante parte do investimento, cofinanciando o proxecto cun total de 468.539,50 euros procedentes de fondos propios xerados pola propia actividade da entidade. Desde ASPABER quixeron destacar especialmente que esta achega é froito do traballo diario realizado por usuarios e traballadores, así como de todos os proxectos, servizos e iniciativas que se desenvolven dentro da entidade, converténdose nun exemplo do esforzo colectivo e do compromiso compartido co futuro da asociación.

Durante o encontro institucional mantido coas diferentes administracións, desde ASPABER aproveitouse tamén para trasladar novas necesidades e proxectos orientados a mellorar os recursos destinados ás persoas con discapacidade da contorna, manifestando o desexo de continuar contando coa colaboración e apoio das institucións para seguir avanzando en inclusión, atención e calidade de vida.

Con esta ampliación, ASPABER dá un novo paso no fortalecemento dos seus servizos, coincidindo ademais cun ano especialmente significativo para a entidade, no que celebra cinco décadas de traxectoria, compromiso e futuro.

Ligazóns

Imaxes